لو بتصمم محطة تحلية مياه بحر قدرة ٣٠٠ متر مكعب يوم أو أكثر يبقى لازم تشوف البوست ده
ناس كتير بتسأل عن فايدة التربو في محطة التحلية
ما هى أهمية استخدام Hydraulic Pressure Booster بمحطات المياة؟
في التصميم هتلاقي انك محتاج ضغط عالي علشان تتغلب على أملاح مياه البحر وبالتالي محتاج مضخة HPP كبيرة ومحرك كبير يسحب كهربا كتير !!
بالتالي هتفكر انك محتاج تقلل حجم طلمبة الضغط العالي HPP وكمان تقلل حجم المحرك بتاعها Motor وبالتالي استهلاك الكهرباء للمحطة Power Consumption
وجود التربو Turbo في التصميم بيحقق كل ده كأنك مشغل مضختين على التوالي Two Pumps in series
واحدة بتشتغل بالكهرباء مضخة HPP وواحدة بدون كهرباء (بتاخد طاقتها من مياه الصرف) وده بيقسم الضغط ما بينهم
Reject water hydraulic power reuse
زي التصميم اللي في الصورة:
لو الاغشية محتاجة ضغط 944 psi
تقدر تجيب مضخة HPP تديلك فقط 542 psi
والضغط الباقي يرفعهولك التربو يعني يرفع 402 psi ببلاش من غير ولا مليم وبيجيب الضغط ده منين؟؟
من الضغط العالي الموجود بمياه الريجكت اللي هنرميها !
بندخل عليه مياه الريجكت تدور التربينة، وعمود التربو ينقل الحركة الدورانية دي لمضخة التربو ناحية الفيد يرفع ضغط مياه الفيد الجاي من HPP ويدخله للأغشية بقيمة أعلى.
علشان كده بنسمي التربو (معزز الضغط) HPB
Hydraulic Pressure Booster
وبكده تبقى حققت الآتي:
١- تقليل حجم مضخة HPP وبالتالي سهولة صيانتها و المكان اللي هتحتاجه وتقليل سعرها كمان
٢- تقليل حجم المحرك الخاص ب HPP وبالتالي تقليل استهلاك الكهرباء ومساحة مقطع الكابلات اللي هتحتاجها وسهولة الصيانة وتقليل السعر والأهم هو تقليل تكاليف التشغيل بخفض استهلاك الكهرباء.
٣- مبيحصلش خلط بين مياه الريجكت ومياه التغذية داخل التربو وبالتالي مفيش زيادة في أملاح الفيد أو ارتفاع للضغوط أو مشاكل تصميمية.
٤- التربو صاحب أصغر مساحة Foot print لجهاز تعويض الطاقة ERD Energy Recovery Device
٥- التربو لا يحتاج طلمبات تعويض اضافية أو تصميم خاص لمحابس وخطوط كبيرة، فقط يتم وضعه بين مضخة HPP و الأغشية وتعود مياه الصرف عليه قبل خروجها من المحطة.
٦- سهولة صيانة التربو وفكه وتركيبه تعطيه أفضلية كبيرة وكذلك سهولة الحصول على قطع غياره ويمكن تصنيع قطع الغيار الخاصة به على المخرطة في حالة الضرورة.
٧- تزداد كفاءة التربو كلما زاد حجم المحطة لتصل في أفضل الحالات المسجلة لدينا ل 82%
٨- التربو فيه محبس Auxiliary Nozzle Valve تقدر من خلاله تتحكم (بقيمة معينة) في ضغوط التشغيل يعني بيديلك مساحة حرية في التشغيل لو الأملاح زادت او قلت أو لو حبيت تزود وتقلل الانتاجية للمحطة بقيم محددة.
٩- التربو تقدر تستخدمه في المحطة البراكيش BWRO كمان مش بس SWRO وساعتها بيتم وضعه بين المرحلة الأولى والتانية لرفع الضغط الداخل للمرحلة التانية
م. محمد على